ფარმაცევტული ბაზარი მორიგ რეგულაციაზე გადასაწყობად ემზადება. 2024 წლის 1 ოქტომბრიდან უკვე ძალაშია “ქართული ოცნების” მთავრობის შესაბამისი დადგენილება, რომელიც ეროვნული რეჟიმით ფარმაცევტული პროდუქტის რეგისტრაციის ან ხელახალი რეგისტრაციის დროს იმპორტიორს და ადგილობრივ მწარმოებელს ავალდებულებს არამხოლოდ საბოლოო პროდუქტის მწარმოებელი ქარხნის GMP სერტიფიკატი, არამედ იმ სუბსტანციის მწარმოებელი ქარხნის GMP წარმოადგინოს, რომელი სუბსტანციაც წარმოებაში გამოიყენება.
როგორც საერთაშორისო ფარმაცევტული კომპანიების წარმომადგენელთა ასოციაციის ხელმძღვანელმა ირაკლი მარგველაშვილმა „საქმიანი დილას“ ეთერში განაცხადა, „ამ სახით ევროპაში კონკრეტული სერტიფიკატების მოთხოვნა არ არის”.
მისი თქმით, როცა კონკრეტულ სერტიფიკატზე ვსაუბრობთ არის გზები რომლითაც შესაძლებელია არა უშუალოდ ამ ტიპის სერტიფიკატის წარმოდგენა, არამედ მისი მსგავსი ანალოგიური დოკუმენტის.
„ფარმაცია რეგულირებადი სფერო უნდა იყოს. თავად იმ სახით რა სახითაც რეგულაცია შემოვიდა და მისი დეფინიციები რომელიც მასშია ჩადებული, – მოთხოვნა კონკრეტული სერტიფიკატების, ამ სახით ევროპაში მოთხოვნა არ არის. თუმცა როცა კონკრეტულ სერტიფიკატზე ვსაუბრობთ არის გზები რომლითაც შესაძლებელია არა უშუალოდ ამ ტიპის სერტიფიკატის წარმოდგენა, არამედ მისი მსგავსი ანალოგიური დოკუმენტის ან იმის დამტკიცება, რომ ეს აქტიური სუბსტანცია არის მედიკამენტებისთვის რომლებიც ევროპის ბაზარზე არის მიმოქცევაში.
ვთანხმდებით, რომ რეგულაციაში არსებული ჩანაწერი, რომელიც კანონშია ქმნის პრობლემას და მას დახვეწა სჭირდება, მაგრამ ასევე ვთანხმდებით, რომ ამ ჩანაწერის ფარგლებში, სანამ ის დაიხვეწება (მოლოდინი მაქვს, რომ ამის დახვეწა მოხდება) ამ რეგულაციის ფარგლებშიც შეგვიძლია უზრუნველყოთ რეგულატორთან ერთად, რომ არცერთი მაღალი ხარისხის მედიკამენტი, რომელიც ევროპის ბაზარზეა მიმოქცევაში საქართველოს ბაზარი არ დატოვოს“, – განაცხადა ირაკლი მარგველაშვილმა.
