“თბილისის მერიის მიერ გაცემული კონკრეტული დავალებების შეუსრულებლობის გამო, ნინი სანადირაძე გათავისუფლდა დაკავებული პოსტიდან”, – უთხრეს მერიის პრესსამსახურში BMG-ის.
დღეს, 4 აპრილს, სანადირაზემ Facebook-ზე კახა კალაძის მიერ ხელმოწერილი გათავისუფლების ბრძანება გამოაქვეყნა და დაწერა რომ თანამდებობა დროზე ადრე დაატოვებინეს.
“მიუხედავად იმისა, რომ გაზაფხულიდან ცხადი იყო განწყობებიც და შემოვლითი მოთხოვნები დამეტოვებინა დირექტორის პოზიცია, ამ დრომდე მხოლოდ კულუარულად ვიცოდი მოსალოდნელის შესახებ, რაც სულ რამდენიმე წუთის წინ, ელექტრონული სისტემით მიღებული დოკუმენტებით დადასტურდა.
რადგან ყველა წესისა და სავალდებულო პროცედურის დარღვევით, ვადამდე ორი წლით ადრე გავთავისუფლდი დაკავებული თანამდებობიდან და არ მომეცა საშუალება, საჯარო ანგარიში ჩამებარებინა თითოეული მოქალაქისთვის – იმ ადამიანებისთვის, რომელთა გადასახადებით ბიუჯეტი ივსება და რომელთა შევსებული ბიუჯეტითა და დამფუძნებლის, იგივე თბილისის მუნიციპალიტეტის მთავრობის ნებით, უფლებამოსილების ფარგლებში განვკარგავდით სახელმწიფო ბიუჯეტს – ვცდილობ, მოკლედ მაინც მოვყვე ზოგად შედეგებს.
2016 წლის აგვისტოდან 2025 წლის 1 აპრილამდე ჩვენ შევძელით ჩაგვეტარებინა, გვემასპინძლა, მოგვემზადებინა და გვემუშავა შემდეგზე:
- 27,177 საგანმანათლებლო პროგრამის მონაწილე;
- 1,654 საგანმანათლებლო პროგრამა;
- 3,060 საფონდო ერთეული;
- 782 მედია გაშუქება;
- 37,363 ვიზიტორი;
- 34,451 დამთვალიერებელი;
- 1,565 შშმ პირი;
- 3,800 სოციალურად დაუცველი პირი;
- 510 გამოფენა და საჯარო ლექცია;
- 29,151 ღონისძიების სტუმარი;
- 7,976 ვიზიტორი International Museum Day-ის ფარგლებში;
- 5,739 IMD-ის დამთვალიერებელი;
- 3,668 IMD პროგრამის მონაწილე;
- 4,210 ექსკურსია”, – წერს სანადირაძე Faceboo-ზე.
2024 წლის ბოლოდან “ქართული ოცნების” მთავრობამ საჯარო მოხელეების თანამდებობიდან გათავისუფლება დაიწყო. ამ პროცესს წინ უძღოდა 28 ნოემბერს ევროინტეგრაციის პროცესის შეჩერებასთან დაკავშირებული განცხადება, რასაც ქვეყანაში პროტესტი მოჰყვა. პროტესტს შეუერთდა საჯარო მოხელეთა ნაწილი. ამის შემდეგ “ქართულმა ოცნებამ” „საჯარო სამსახურის შესახებ” კანონში ცვლილებები შეიტანა და საჯარო სამსახურში რეორგანიზაციის პროცესი გაამარტივა.
