რა გახდა საგანგებო რეჟიმის ამოქმედების მიზეზი და რა შედეგები შეიძლება მოჰყვეს ამ გადაწყვეტილებას? – მადუროს მიერ ხელმოწერილი დეკრეტი, რომელიც საგანგებო ეკონომიკურ მდგომარეობას აცხადებს, გულისხმობს რიგი მნიშვნელოვანი ზომების მიღებას: დროებით შეჩერდება გადასახადების ამოღება და აღსრულება, რაც ბიზნესს გარკვეულწილად ამოსუნთქვის საშუალებას მისცემს. ასევე, შესაძლებელი გახდება ბიუჯეტის გარეთ არსებული სახსრების დახარჯვა, რაც ხელისუფლებას დამატებით ფინანსური მანევრირების შესაძლებლობას აძლევს.
მნიშვნელოვანი მომენტი, რომელიც განსაკუთრებულ ყურადღებას იმსახურებს, არის იმპორტის ჩანაცვლების მექანიზმების დანერგვა და გადასახადებისგან თავის არიდებასთან ბრძოლა, რაც თეორიულად უნდა დაეხმაროს ადგილობრივი წარმოების სტიმულირებას. თუმცა, პრაქტიკული ეფექტურობა დამოკიდებული იქნება ხელისუფლების მიერ კონკრეტული ღონისძიებების ეფექტურ განხორციელებაზე.
ამავდროულად, პრეზიდენტმა მადურომ ღიად მოუწოდა საერთაშორისო ინვესტორებს და აღნიშნა, რომ ვენესუელაში ინვესტიციების განხორციელების მსურველებს განსაკუთრებული პირობებით შეხვდებიან. ეს პირდაპირ მიუთითებს, რომ რეჟიმის მთავარი ამოცანა, საგარეო ფინანსური რესურსების მოზიდვაა, რაც ქვეყნის მძიმე ეკონომიკური მდგომარეობის ფონზე, სასიცოცხლოდ მნიშვნელოვანია.
საგანგებო რეჟიმის შემოღებას წინ უძღოდა მადუროს მიერ საკონსტიტუციო ცვლილებების ინიციატივა, რომელიც მიზნად ისახავდა ტერიტორიული რეფორმებისა და ეკონომიკის დივერსიფიკაციის განხორციელებას.
უნდა აღინიშნოს, რომ ასეთი რეჟიმის შემოღება ყოველთვის ითვალისწინებს რისკებს, მათ შორის პოლიტიკურ და სოციალურ არასტაბილურობას, თუმცა ამ ეტაპზე, როდესაც ვენესუელური ეკონომიკა პრაქტიკულად პარალიზებულია, ასეთი უკიდურესი ზომები, შესაძლოა, ერთადერთ ნაბიჯად რჩებოდეს.
