TECHZY – ციფრული ტრანსფორმაციის კომპანიაა, რომლის მთავარი მიზანი ქართული კომპანიების ციფრული ტრანსფორმაცია და მათთვის ამ პროცესში საჭირო ყველა სერვისის შეთავაზებაა. სწორედ TECHZY-მ შექმნა „კოკა-კოლა ბოთლერს ჯორჯიას“ ლოიალობის აპლიკაცია, რომელსაც უკვე თვალსაჩინოდ წარმატებული შედეგები აქვს.
როგორც TECHZY-ს დამფუძნებელი ნიკოლოზ ძნელაძე bm.ge-სთან ამბობს, დღეს „კოკა-კოლას“ აპლიკაციას უკვე 350 000 მომხმარებელი ჰყავს და საქართველოში ჩამოწერების რაოდენობით ნოემბერ-დეკემბრის პერიოდში ChatGPT-საც გადაასწრეს.
„TECHZY ამბიციური კომპანიაა და გვინდოდა თანამშრომლობისთვის ბაზარზე ყველაზე ამბიციური კომპანია გვეპოვა. სწორედ ასეთია „კოკა-კოლა ბოთლერს ჯორჯია“, მათთან ლოიალობის აპლიკაციის იდეით მივედით, კომპანიის გუნდმა ჩვენი ხედვა გაიზიარა, რომელიც მომავლის ხედვას ეფუძნებოდა.
კოკა-კოლას გუნდთან ერთად კონცეპტის შემუშავება დავიწყეთ, დღეს კი იქამდე მივედით, რომ აპლიკაციას უკვე 350 000 მომხმარებელი ჰყავს, ყოველდღიურად კი ასობით ვაუჩერი იცვლება. მეტიც, ნოემბერ-დეკემბერში ქართულ ბაზარზე ჩამოწერების რაოდენობით ChatGPT-საც გავასწარით. ეს დიდი ციფრული წარმატებაა, რომელიც ჯერ მხოლოდ დასაწყისია“ – აღნიშნავს TECHZY-ს დამფუძნებელი.
„კოკა-კოლა ბოთლერს ჯორჯიას“ აპლიკაციის გეგმები კიდევ უფრო ამბიციური და მასშტაბურია. მიზანი საერთაშორისო ბაზარზე გასვლაა.
„კოკა-კოლა ბოთლერს ჯორჯიას“ აპლიკაციის მომდევნო სამი წლის გეგმა გაწერილია. იგეგმება აპლიკაციის უცხოეთში გატანაც, დაინტერესება არის სხვადასხვა ქვეყნიდან.
საქართველოში შექმნილი კოკა-კოლას აპლიკაცია ახლა გლობალურ ოფისთან, ატლანტის ოფისთან გადის უსაფრთხოების შემოწმებას. უკვე ხუთი რეპორტი მოვიდა და ხუთივე წარმატებულია. საბოლოო შედეგი იქნება რომ „ტექზის“ პროდუქტი გახდება „გლობალ“ კოკა-კოლას პროდუქტი. ჩვენ გვექნება გლობალური „კოკა-კოლას“ სათავო ოფისისთვის დაწერილი აპლიკაცია“ – განმარტავს ნიკოლოზ ძნელაძე.
