რომელი ქვეყნები ხარჯავენ ყველაზე მეტს ჯანდაცვაზე და რომლებს აქვთ საუკეთესო სისტემა?

ჯანდაცვაზე გამოყოფილი რესურსები და მისი ეფექტიანი გამოყენება ქვეყნის კეთილდღეობისა და მოქალაქეების ცხოვრების ხარისხის განმსაზღვრელი ერთ-ერთი ყველაზე მნიშვნელოვანი ინდიკატორია. ზოგიერთი ქვეყანა ჯანდაცვაზე დიდ თანხებს ხარჯავს, თუმცა არანაკლებ მნიშვნელოვანია, თუ როგორ მუშაობს თავად სისტემა — რამდენად ხელმისაწვდომია, რა სისწრაფით ხორციელდება სერვისი და რა ხარისხის სამედიცინო მომსახურებას იღებს მოქალაქე.

ხარჯების მიხედვით ვითარება ასეთია:

1. აშშ
ხარჯი ერთ სულ მოსახლეზე: $12,742

მიუხედავად მაღალი დანახარჯებისა და იმ ფაქტისა, რომ ქვეყანა მშპ-სთან მიმართებით თითქმის 17%-ს ხარჯავს, სისტემა მაინც არ არის უნივერსალური, რაც ხელმისაწვდომობის სერიოზულ პრობლემას ქმნის.

2. შვეიცარია
ხარჯი ერთ სულ მოსახლეზე: $9,044

შვეიცარია ერთ-ერთი ყველაზე ეფექტური კერძო და საჯარო სისტემის მქონე ქვეყანაა, სადაც მოქალაქეები მაღალი ხარისხის სერვისს იღებენ, თუმცა ფასებიც შესაბამისად მაღალია.

3. ნორვეგია
ხარჯი ერთ სულ მოსახლეზე: $7,500

ნორვეგიის უნივერსალური ჯანდაცვის სისტემა სახელმწიფოს მხრიდან სრულად დაფინანსებულია და მოიცავს როგორც პრევენციულ, ასევე რთულ სამედიცინო მომსახურებებს.

4. ავსტრია
ხარჯი ერთ სულ მოსახლეზე: $7,200

ავსტრია უზრუნველყოფს მაღალი ხარისხის საყოველთაო ჯანდაცვას და საკმაოდ ძლიერი ჰოსპიტალური ქსელითაც გამოირჩევა, თუმცა ხარჯიც შესაბამისია.

5. გერმანია
ხარჯი ერთ სულ მოსახლეზე: $7,000

გერმანია აერთიანებს საჯარო და კერძო დაზღვევის სისტემებს, რაც ქმნის მოქნილ, ხარისხიან და ხელმისაწვდომ ჯანდაცვის სისტემას, თუმცა მას ხშირად აკრიტიკებენ ბიუჯეტის ზეწოლის გამო.

ხარჯვა მხოლოდ ერთი მხარეა. სისტემის ხარისხი შეფასებულია ისეთი კრიტერიუმებით, როგორიცაა: სიცოცხლის ხანგრძლივობა, სერვისის სისწრაფე, პრევენციული მომსახურება და საზოგადოებრივი კმაყოფილება. ამ კრიტერიუმებით, როგორც ხედავთ, შედარებით განსხვავებული ვითარებაა:

1. ტაივანი
საერთო ქულა: 86.5 / 100

უნივერსალური დაზღვევა, სწრაფი სერვისი და დაბალი დანახარჯი – ეს ის მიზეზებია, რომელთა წყალობით ტაივანი Numbeo-ს რეიტინგში პირველ ადგილს იკავებს. ტაივანის ეროვნული ჯანმრთელობის სისტემა (NHI) ერთ-ერთ ყველაზე ეფექტურად ითვლება მსოფლიოში, რაც ფასისა და ხარისხის შეფარდებით არის განპირობებული.

2. სამხრეთ კორეა
საერთო ქულა: 82.8

სამხრეთ კორეას ძლიერი სახელმწიფო ჯანდაცვის სისტემა აქვს, რომელიც მაღალი ხარისხის სამედიცინო ინფრასტრუქტურას ხელმისაწვდომ ფასებთან აერთიანებს.

3. იაპონია
საერთო ქულა: 80

იაპონიაში მოქმედებს უნივერსალური დაზღვევის სისტემა და მოსახლეობის რეგულარული სამედიცინო შემოწმებები მაღალი სტანდარტით ტარდება. ამასთან, სიცოცხლის საშუალო ხანგრძლივობა იაპონიაში 85 წელს აღწევს, რაც გლობალური რეკორდია და ის სწორედ ჯანდაცვის სისტემის დამსახურებაა.

4. ნიდერლანდები
საერთო ქულა: 79.3

საჯარო-კერძო მოდელის ეფექტური შერწყმა, ინოვაციური სამედიცინო ტექნოლოგიები და მაღალი მოქალაქეობრივი ჩართულობა – ამ უპირატესობების გათვალისწინებით, ნიდერლანდები რეიტინგში მე-4 ადგილზეა.

5. დანია
საერთო ქულა: 78.4

დანიის სისტემა გამორჩეულია პროფილაქტიკური მიდგომით და სრულად ციფრული ადმინისტრაციით. მაღალი ხარისხის საზოგადოებრივი კლინიკები და სწრაფი დახმარების სისტემა ხელმისაწვდომია აბსოლუტურად ყველა მოქალაქისათვის. რაც მთავარია, დანიაში ვერ შეხვდებით რიგებს, გაწელილ პროცესებს და სხვა სახის ადმინისტრაციულ გართულებებს.