14 მაისს, რუსეთის ფედერაციისა და საქართველოს წარმომადგენლებმა მოსკოვში ქვეყნებს შორის სავაჭრო ბრუნვის გაფართოება განიხილეს. ამას გარდა, რუსულმა მხარემ გამოთქვა სურვილი, რომ რუსეთ-საქართველოს შორის სარკინიგზო და საზღვაო მიმოსვლა აღდგეს და მხარეებმა ანგარიშსწორება რუბლში დაიწყონ. ამის შესახებ რუსული გამოცემა “იზვესტიაზე” დაყრდნობით “ეხო კავკაზა” წერს. შეხვედრაზე ქართულ მხარეს წარმოადგენდა საქართველო-რუსეთის ბიზნეს ასოციაციის საბჭოს თავმჯდომარე ზაზა ნიშნიანიძე, რომლის შექმნის შესახებაც მედია წლის დასაწყისში წერდა. ნიშნიანიძე მსხვილი ქართული უძრავი ქონების მართვისა და განვითარების კომპანიის, “მეიდან ჯგუფის” მფლობელია. ბიზნეს ასოციაციის აღმასრულებელი დირექტორი რუსი ბიზნესმენი და გაერთიანებული მარცვლეულის კომპანიის ხელმძღვანელი მარატ შაიდაევია. შეხვედრაზე მხარეებმა განიხილეს ზემო ლარსის საკონტროლო-გამშვებ პუნქტის გადატვირთვის გეგმა და სავაჭრო ბრუნვის ნაწილის “რკინიგზითა და საზღვაო ტრანსპორტით” გადატანის აუცილებლობა. ასევე საუბარი იყო ტვირთის კონტროლის გაძლიერებაზე. რუსული მედია წერს, რომ “ქართულმა მხარემ პირობა დადო, რომ უახლოეს მომავალში ამ მიზნებისთვის ახალ ლაბორატორიას მოაწყობს”. შეხვედრაზე ასევე შემოთავაზებული იყო ქვეყნებს შორის ურთიერთანგარიშსწორების დაწყება რუბლითა და ლარით. ეს იდეა ადრეც განიხილეს. “იზვესტია” აღნიშნავს, რომ რუსულმა მხარემ შეხვედრაზე წარმოადგინა დოკუმენტაცია, რომელშიც ქართული პროდუქციის დაბალ ხარისხზე იყო საუბარი. კერძოდ იმაზე, რომ რუსული მაღაზიებიდან ქართული კონიაკის პარტია ამოიღეს. “ძალიან ვიმედოვნებთ, რომ ჩვენს შეშფოთებას საქართველოს ხელმძღვანელობას გადასცემთ”, — მიმართა შეხვედრის მონაწილეებს ვლადისლავ რეზნიკმა, საერთაშორისო ასოციაცია “ანტიფალსიფიკაციის” პრეზიდენტმა და კონიაკის, სპირტიანი სასმელებისა და ალკოჰოლური სასმელების მწარმოებელთა კავშირის თავმჯდომარემ. მისი თქმით, თბილისს აქვს კონიაკის დისტილატის წარმოების შესაძლებლობა, რომელიც რუსეთის ფედერაციაში დეფიციტურია. გარდა ამისა, მან გამოხატა სიხარული იმასთან დაკავშირებით, რომ საქართველო ანტირუსულ კამპანიაში არ ჩაერთო”. რუსული გამოცემა წერს რუსეთის ფედერაციასა და საქართველოს შორის სავაჭრო ბრუნვის ზრდაზე (2024 წელს მან 2,5 მილიარდ დოლარზე მეტი შეადგინა) და აღნიშნავს, რომ საქართველო რუსეთში ღვინისა და სხვა ალკოჰოლური სასმელების, მინერალური წყლის, ლიმონათის, ასევე ხილისა და ბოსტნეულის ექსპორტს ახორციელებს, რუსეთი კი საქართველოში ნავთობისა და ნავთობპროდუქტების, გაზის, ფოლადის პროდუქტებისა და ხორბლის ექსპორტს ახორციელებს. საქართველო-რუსეთის ბიზნეს-ასოციაცია ოფიციალურად 2025 თებერვალში დარეგისტრირდა. Bm.ge-ს ინფორმაციით, ამონაწერის თანახმად, ბიზნეს-ასოციაციის გამგეობის წევრები არიან: თავმჯდომარე/წევრი: ზაზა ნიშნიანიძე, რომელიც საქართველოსა და რუსეთის ორმაგი მოქალაქეა; გამგეობის წევრები არიან, ასევე საქართველო-რუსეთის ორმაგი მოქალაქეები: ლავრენტი ანჩაბაძე, ვახტანგ კარიჭაშვილი, ბადრი კაკაბაძე და დავით ხარაიძე. გენერალური დირექტორი ასევე ორმაგი მოქალაქე მარატ შაიდაევია. აღმასრულებელი დირექტორი კი, გიორგი მუსხელიშვილი. ბიზნეს ასოციაციის ხელმძღვანელის თქმით, ასოციაციის უმთავრესი მიზანი იქნება, დაეხმაროს იმ ბიზნესმენებს, რომლებიც რუსეთში ექსპორტით არიან დაკავებული. ქართული ოცნების პირველი ვიცე-პრემიერი, ეკონომიკის მინისტრი ლევან დავითაშვილი ქართულ-რუსული ბიზნეს-ასოციაციის შექმნას დადებითად აფასებს და ამბობს, რომ ორგანიზებულ ბიზნესთან კოორდინაცია ბევრად ადვილია. მან ამის შესახებ 21 იანვარს BMG-ის კითხვის პასუხად განაცხადა.
რუსეთ-საქართველოს შორის სარკინიგზო და საზღვაო მიმოსვლის აღდგენა, რუბლში ანგარიშსწორება — რაზე
