“საჭირო იყო ხალხის მომზადება, საინფორმაციო ჯგუფების შექმნა, მაგრამ პროცესს მოუმზადებელი შევხვდით”- მეფუტკრეები ახალ დაავადებას ებრძვიან
მეფუტკრეები ტროპილელაფსოზის დაავადებას ებრძვიან და ამბობენ, რომ ამ მიზეზის გამო წელს თაფლის მოსავალი ბევრად ნაკლები იქნება ვიდრე გასულ წელს იყო.
მეფუტკრეთა გაერთაინების გამგეობის თავმჯდომარე ამბობს, რომ საკითხზე მთავრობასთან ერთად სწრაფი რეაგირების სამუშაო ჯგუფი შეიქმნა, რომელიც დაავადებასთან ბრძოლის მეთოდებზე მუშაობს.
საქართველოს მეფუტკრეთა გაერთიანება, ვეტერინარიის კომიტეტის ხელმძღვანელი ამბობს, რომ მათ შესაბამის უწყებებთან კომუნიკაცია უკვე რამდენიმე თვეა აქვთ, მაგრამ დროულად ნაბიჯების გადადგმა ახლა დაიწყო, მათი შეფასებით, პროცესები დაგვიანებულია, რაც დასავლეთ საქართველოში ფუტკრის ოჯახების განადგურებაში გამოიხატა.
“გავრცელება ფაქტობრივად ყველგან არის, უბრალოდ არის მომენტები, როცა ეს ოფიციალურად არ ცხადდება. არსებობს ცხელი ხაზი 15 01, სადაც ვალდებულება აქვს აღმომჩენს, რომ დარეკოს, რაზეც რეაგირება ექნება ვეტერინარიის სამსახურს. ხალხი ინფორმაციის გაცხადებას ერიდება, რადგან რაღაც შემდეგ შეზღუდვებია. ეს მოსავლიანობაზე იმოქმედებს. როცა დაავადება დაფიქსირდა გაიდლაინი შევიმუშავეთ, ჩავატარეთ შეხვედრები, მაგრამ ის პროცედურები, რომელიც ჩვენ მაშინ შევიმუშავეთ იყო შემოდგომაზე ჩასატარებელი, გაზაფხულზე ძალიან რთულად გვაქვს საქმე. ამ პერიოდში უფრო სწრაფად მრავლდება პარაზიტი.
საჭირო იყო ხალხის მომზადება, საინფორმაციო ჯგუფების შექმნა, ბოლოს მივედით იქამდე რომ ძალიან მოუმზადებელი შევხვდით პროცესს, მეფუტკრე ვეტერინარები ფიზიკურად არ გვყავს. კანონმდებლობაც ამ კუთხით გვაქვს გერმანული, სადაც ტროპილელაფსოზი საერთოდ არ არსებობს.
გამოსავალი შეიძლება მოვძებნოთ, მაგრამ 1-2 წლის განმავლობაში ჩვენ ამ გამოსავლის ძიებაში ვიქნებით. სამინისტროში შექმნილია სამუშაო ჯგუფი, რომელსაც ხელმძღვანელობს ირაკლი ჯანაშია, რომელიც რაღაც კვლევებს დაიწყებს, მაგრამ კვლევები შედეგებს დადებს წლების შემდეგ, მანამდე რას ვშვრებით? ჩვენ ვთავაზობთ, საქართველოს მეფუტკრეთა გაერთიანება ყველას ვისაც ფუტკართან ჰქონია შეხება, შევიმუშაოთ გზამკვლევი. ჩემი ვარაუდით, წელს გვექნება 50% ფუტკრის დაცემა,”-ამბობს საქართველოს მეფუტკრეთა გაერთიანება, ვეტერინარიის კომიტეტის ხელმძღვანელი გიორგი ლაკვეხელიანი.
