წარმოგიდგენთ იმ სარკინიგზო კომპანიათა რეიტინგს, რომლებმაც 2024 წელს ყველაზე მაღალი შემოსავალი მიიღეს.
10. Canadian Pecific Railway – $10.55 მლრდ
ალბერტაში, ქალაქ კალგარში ბაზირებული სარკინიგზო ხაზის ოპერატორის, Canadian Pecific Railway Limited-ის შემოსავალი 2024 წლის ანგარიშგების თანახმად, $10.55 მილიარდს შეადგენს. Canadian Pecific მონტრეალიდან ვანკუვერამდე 20 000 კილომეტრიან სარკინიგზო ხაზს მართავს. მისი მმართველობის ქვეშაა რკინიგზა მინეაპოლისში, დეტროიტში, ჩიკაგოში, ნიუ-იორკსა და შეერთებული შტატების სხვა ქალაქებშიც. 2023 წელს სარკინიგზო კომპანიის შემოსავალი $9.37 მილიარდი იყო.
9. Kintetsu GHD – $11.11 მლრდ
Kintetsu Group Holdings იაპონური ჰოლდინგური კომპანიაა, რომელიც Kintetsu Railway-სა და Kintetsu World Express-ს მართავს, სხვა 142 კომპანიასთან ერთად. მგზავრთა გადამყვანი Kintetsu Railway იაპონიის უმსხვილესი სარკინიგზო სისტემაა, Japan Railways Group-ის გამოკლებით, და 501 კმ-ს მოიცავს. Kintetsu GHD-მ გასულ წელს $11.11 მილიარდის შემოსავალი მიიღო, 2023 წელს კი – $11.72 მლრდ.
8. West Japan Railway – $11.15 მლრდ
West Japan Railway – Japan Railways Group-ში შემავალი კომპანიაა, რომელიც ქვეყნის დასავლეთით, კუნძულ ჰონსიუზე ოპერირებს. სარკინიგზო ოპერატორის შემოსავალმა 2024 წელს $11.15 მილიარდი შეადგინა, რაც 2023 წელთან შედარებით მცირედითაა შემცირებული. 2023 წლის 12 თვეში West Japan-მა $11.39 მილიარდის შემოსავალი მიიღო.
7. Central Japan Railway – $11.67 მლრდ
Japan Railways Group-ში შემავალი მორიგი კომპანია JR Central ცენტრალურ იაპონიაში მოქმედი მთავარი სარკინიგზო კომპანიაა, რომელიც იაპონიაში ჩქაროსნული სარკინიგზო ხაზის ერთ-ერთ უმსხვილეს ოპერატორსაც წარმოადგენს. გასულ წელს JR Central-ის შემოსავალი თითქმის უცვლელი დარჩა და $11.64 მილიარდიდან წლიურად $11.67 მილიარდამდე გაიზარდა.
6. Norfolk Southern – $12.11 მლრდ
ამერიკის შეერთებული შტატების აღმოსავლეთ ნაწილში მოქმედი კომპანია Norfolk Southern Railway 31 100 კმ-იან სარკინიგზო ხაზს ქვეყნის 22 შტატში მართავს. კომპანიის ბოლო ანგარიშგების თანახმად, მისმა შემოსავალმა 2024 წელს $12.11 მილიარდს მიაღწია.
5. Canadian National Railway – $12.37 მლრდ
მონტრეალში ბაზირებული ოპერატორი კანადაში, შუა აღმოსავლეთ და სამხრეთ შეერთებულ შტატებში მოქმედი, კანადის უმსხვილესი სარკინიგზო კომპანიაა, რომელიც 32 000 კმ-იან სარკინიგზო ხაზს მართავს. გასულ წელს Canadian National Railway-ის შემოსავალმა $12.37 მილიარდი შეადგინა.
4. CSX Corporation – $14.28 მლრდ
CSX Corporation ამერიკული ჰოლდინგური კომპანიაა, რომელიც აშშ-სთან ერთად კანადის ორ პროვინციაში – ონტარიოსა და კვებეკში – 34 000 კმ-იან სარკინიგზო ხაზს მართავს. კომპანიის შემოსავალი 2024 წელს $14.28 მილიარდი იყო.
3. East Japan Railway – $18.62 მლრდ
Japan Railways Group-ში შემავალი შვიდი კომპანიიდან უმსხვილესი, JR East ტოკიოში, შიბუასა და იოიოგიში ბაზირებული სამგზავრო სარკინიგზო კომპანიაა, რომელიც, ამავდროულად, იაპონიაში ყველაზე შემოსავლიანი სარკინიგზო ოპერატორიცაა. East Japan Railway-ის 2024 წლის შემოსავალი $18.62 მილიარდია.
2. Union Pacific Corporation – $24.25 მლრდ
ამერიკის შეერთებული შტატების ყველაზე შემოსავლიანი სარკინიგზო კომპანია 8300 ლოკომოტივსა და 51 700 კმ სიგრძის სარკინიგზო ხაზს მართავს. კომპანია დუოპოლიას აშშ-ის უმსხვილეს რკინიგზასთან, BNSF-სთან იზიარებს, რომელთანაც ტრანსკონტინენტურ სატვირთო სარკინიგზო ხაზებს იყოფს. 2024 წელს Union Pecific-ის შემოსავალმა $24.25 მილიარდი შეადგინა.
1. China Railway Construction – $148.14 მლრდ
რეიტინგში პირველი ჩინური კომპანიის 2024 წლის შემოსავალი დაახლოებით 500%-ით აღემატება მისი წინამორბედის მაჩვენებლებს. China Railway Construction Corporation აშშ-ის მიერ სანქცირებული, უკრაინის მიერ კი “ომის საერთაშორისო სპონსორთა” სიაში შეყვანილი კომპანიაა. კომპანია სახელმწიფო საკუთრებაში არსებული “ქონების ზედამხედველობისა და ადმინისტრირების ეროვნული საბჭოს” მართვის ქვეშაა და მსოფლიოს ერთ-ერთ უმსხვილეს სამშენებლო ჯგუფს წარმოადგენს. CRCC-ის შემოსავალი 2022 წლიდან კლების ტენდენციას აფიქსირებს და 2024 წელს $148.14 მილიარდი შეადგინა.
