შვედეთი საქართველოს ხელისუფლებას დახმარებას უწყვეტს, თუმცა სამოქალაქო სექტორის მხარდამჭერად

საქართველოს მეხუთე პრეზიდენტმა, სალომე ზურაბიშვილმა განაცხადა, რომ შვედეთის პრემიერ-მინისტრისგან პერსონალური წერილი მიიღო. მისი თქმით, წერილში „დიდი წუხილია გამოთქმული იმის შესახებ, თუ რა მდგომარეობაა დღეს საქართველოში დემოკრატიისა და ადამიანის უფლებების კუთხით.“

ზურაბიშვილის ბრიფინგზე გაცხადებული ინფორმაციით, შვედეთის პრემიერი წერილში აღნიშნავს, რომ „ელოდებიან, საქართველოს მთავრობამ გადადგას აუცილებელი ნაბიჯები, რათა დასრულდეს კრიზისი და დაბრუნდეს ნდობა დემოკრატიული ინსტიტუტების.“

„მინდა გაგაცნოთ შვედეთის პრემიერის წერილი, რომელიც მივიღე პერსონალურად. ის გამოთქვამს ძალიან დიდ წუხილს იმის შესახებ, თუ რა მდგომარეობაა დღეს საქართველოში დემოკრატიისა და ადამიანის უფლებების კუთხით. რომ რეალურად, სამოქალაქო სივრცე ძალიან შეზღუდულია და კიდევ უფრო იზღუდება. ამასთან, ის რომ ეს არ შეეფარდება არც ევროკავშირის ღირებულებებს და არც საქართველოს გზას ევროპისკენ“, — განაცხადა ზურაბიშვილმა.

მისი თქმით, შვედეთის მთავრობამ უკვე მიიღო გადაწყვეტილება, „შეეწყვიტა ერთ-ერთი მთავარი დონორის ყველანაირი დახმარება საქართველოს ე.წ. მთავრობისთვის.“

თუმცა, შვედეთი მზადყოფნას გამოხატავს, რომ „დარჩეს მხარდამჭერი საქართველოს დემოკრატიული განვითარებისა და მისი ევროპული გზის; რომ დარჩეს, როგორც დონორი, ოღონდ სამოქალაქო საზოგადოებისთვის.“

„[წერილში აღნიშნულია, რომ] ამ კუთხით, ჩვენ ვაკვირდებით დღევანდელ კანონმდებლობას, რომ გავიგოთ, რა ფორმით უნდა გავაგრძელოთ ეს მხარდაჭერა საქართველოს სამოქალაქო საზოგადოებისთვისო. ამასთან ის, რომ ჩვენ, ევროპის სხვა ქვეყნები, გავაგრძელებთ საქართველოს მდგომარეობის ამ მკაფიო დაკვირვებასო. ვრჩებით, როგორც დიდი მხარდამჭერი მოსახლეობის და მისი ევროპული გზის, მისი დემოკრატიული განვითარების“, — აღნიშნა მან.

ზურაბიშვილის თქმით, კრიზისიდან გამოსვლის ერთადერთი გზა „ახალი საპარლამენტო არჩევნებია.“

„ამ კრიზისიდან გამოსვლა ჩვენ კარგად ვიცით, რომ არის ერთი და მხოლოდ ერთი – ახალი საპარლამენტო არჩევნები. არც ერთ სხვა ფორმას, არც ერთი სხვა არჩევნების ჩატარებას არ აქვს უნარი, რომ ამ ქვეყანაში დაასრულოს ანტიდემოკრატიული რეჟიმი, ანტიამერიკული, როგორც ამერიკელებმა თქვეს და ანტიევროპული, როგორც ევროპელები ამბობენ. ერთადერთი მშვიდობიანი გზა არის ახალი საპარლამენტო არჩევნები”.

შვედეთის მთავრობამ გასული წლის 29 ოქტომბერს განაცხადა, რომ საქართველოსთან წყვეტს ყველა სახის პირდაპირ ოფიციალურ თანამშრომლობას. პარალელურად, შვედეთი 25 მილიონ კრონს (დაახლოებით 2 170 000 ევრო) გამოყოფს საქართველოს სამოქალაქო საზოგადოებისთვის.