როგორც BM.GE-ის ეკონომიკის სამინისტროში განუცხადეს, საუბარია კომერციული მიზნით ტურისტული ან საერთაშორისო არარეგულარული (დაკვეთით), მგზავრების გადაყვანის შემთხვევებზე, რა დროსაც ყველა გადამზიდველმა სავალდებულოდ უნდა შეავსოს მგზავრთა სია, რომელიც ECMT-ის (ტრანსპორტის მინისტრთა ევროპის კონფერენციის) საერთაშორისო სტანდარტს აკმაყოფილებს.
მგზავრთა სია სავალდებულოა ყველა M1(მინივენი), M2 და M3 კატეგორიის ავტოსატრანსპორტო საშუალების (მინივენები, ავტობუსები და მიკროავტობუსები) შემთხვევაში.
“დოკუმენტი უნდა შეივსოს ელექტრონულად, ლათინური ასოებით, მგზავრობის დაწყებამდე. ბეჭდური ვერსია უნდა ინახებოდეს ავტოსატრანსპორტო საშუალების ბორტზე და წარედგინოს მაკონტროლებელ ორგანოს. სია უნდა ამოიბეჭდოს მხოლოდ A4 ფორმატზე.
ახალი რეგულაციის თანახმად, საქართველოსა და სომხეთის მაკონტროლებელი ორგანოები სატრანსპორტო დოკუმენტაციაში არსებულ მონაცემებს იდენტური მეთოდოლოგიით შეამოწმებენ, რაც კონტროლის ეფექტურობას გაზრდის. გარდა ამისა, აღნიშნული დაიცავს როგორც საქართველოში, ისე სომხეთში რეგისტრირებული გადამზიდველების უფლებებს და აღმოფხვრის ორივე ქვეყანაში კაბოტაჟურ საავტომობილო სამგზავრო გადაყვანებს.
აღნიშნული გადაწყვეტილება მიღებულ იქნა საქართველო-სომხეთის შერეული კომისიის სხდომაზე, რომლის დროსაც საერთაშორისო სამგზავრო გადაყვანებთან დაკავშირებით ახალი შეთანხმება გაფორმდა”, – განუცხადეს bm.ge-ის საქართველოს ეკონომიკის სამინისტროში.
