გამოძიების ინფორმაციით, ა.ც. და დ.ც. მოქმედებდნენ როგორც სამშენებლო კომპანია „სექტორი 7“-ის ხელმძღვანელები და 2020-2024 წლებში მოქალაქეებთან აფორმებდნენ ხელშეკრულებებს საცხოვრებელი ფართების გაყიდვაზე. მათ მიერ მიღებული თანხების მიუხედავად, ბინების მშენებლობა არ დასრულდა და მოქალაქეებმა ფართები საკუთრებაში ვერ მიიღეს.
შსს-ს მიერ გავრცელებული ინფორმაციით, დაზარალებულთა რაოდენობა 161-ს შეადგენს, ხოლო ფინანსური ზარალი 11 მილიონ ლარს აჭარბებს.
შინაგან საქმეთა სამინისტროს ცნობით, ა.ც. დაკავებულია მოსამართლის განჩინების საფუძველზე, ხოლო დ.ც.-ს, როგორც ორგანიზებული ჯგუფის წევრს, დამატებით წარედგინა ბრალდება.
გამოძიება საქართველოს სისხლის სამართლის კოდექსის 180-ე მუხლის მესამე და მეოთხე ნაწილებით მიმდინარეობს, რაც ორგანიზებული ჯგუფის მიერ ჩადენილ თაღლითობას გულისხმობს და 10 წლამდე თავისუფლების აღკვეთას ითვალისწინებს.
