„ამბასადორი აილენდ ბათუმი“ დაახლოებით 3 თვეში, ნახევარკუნძულის 25 ჰა-ს ექსპლუატაციაში მისაღებად ემზადება, რაც იმას ნიშნავს, რომ ორი ნახევარკუნძულიდან ერთი ფაზური განვითარების კუთხით, შემდგარი პროდუქტი იქნება.
აჭარაში, კერძოდ ბათუმში $100 მილიონიანი პროექტის განვითარების ეტაპებსა და გეგმებზე კომპანიის გენერალურმა დირექტორმა, გოჩა კამკიამ BMGTV-ს გადაცემაში „ბიზნესის კვირეულთან” ინტერვიუში ისაუბრა.
ბათუმში 2 ნახევარკუნძულისა და ერთი კუნძულის მასშტაბური პროექტი 2021 წელს დაანონსდა. ინვესტორი კი “ამბასადორი ჯგუფი” გახდა, რომელთანაც სახელმწიფომ საინვესტიციო ხელშეკრულება გააფორმა. შეთანხმების მიხედვით, ქალაქ ბათუმში, 84 ჰა ტერიტორიაზე 2 ნახევარკუნძულის და კუნძულის განვითარება უნდა მოხდეს, რაზეც შემდგომში ინფრასტრუქტურა განვითარდება. „ამბასადორი აილენდ ბათუმის“ პროექტის ფარგლებში ტერიტორიაზე იგეგმება პლაჟების, აქტიური და პასიური დასვენების კუთხეების, სასეირნო პრომენადებისა და ზღვისპირა ბულვარის მოწყობა. ამასთან, აკვაპარკების, იახტკლუბის, საგანმანათლებლო დაწესებულებების, სავაჭრო ცენტრების, სასტუმროებისა და საცხოვრებელი დანიშნულების ნაგებობები მშენებლობა. აქვე უნდა აღინიშნოს, რომ წარმოდგენილ კონცეფციას სხვა მნიშვნელოვანი დატვირთვაც აქვს, როგორიცაა მსხვილმასშტაბიანი ინვესტიციების მოზიდვაა.
როგორც “ბიზნესის კვირეულთან” ინტერვიუში „ამბასადორი აილენდ ბათუმის” გენერალურმა დირექტორმა გოჩა კამკიამ აღნიშნა, საინვესტიციო ხელშეკრულების თანახმად, კომპანიამ პროექტთან დაკავშირებით ნებართვის აღებისა და სამუშაოების დაწყება მიმდინარე წლის 30 სექტემბრიდან უნდა აითვალოს, თუმცა კომპანია ვალდებულებით ნაკისრ ვადებს უსწრებს და პროექტს ეტაპობრივად გაწერილი გეგმით ავითარებს.
“ხელშეკრულების თანახმად, სამუშაოები მიმდინარე წლის 30 სექტემბრიდან უნდა დაგვეწყო, თუმცა მოცემულ შემთხვევაში მუხლჩაუხრელი შრომის შედეგად, დამდგარია საოცარი შედეგები, კერძოდ ვემზადებით ახალი ინიციატივებისათვის.
იმისათვის, რომ პროექტი საწყისი ეტაპიდანვე განვითარებულიყო, პროექტში ეტაპობრივი განვითარების მექანიზმები ჩავდეთ. ამგვარად, დაახლოებით 3 თვის განმავლობაში, ამ ნახევარკუნძულიდან 25 ჰა ფართის ექსპლუატაციაში მისაღებად ვემზადებით. ეს კი იმას ნიშნავს, რომ ბათუმის 2 ნახევარკუნძულიდან ერთ-ერთი უკვე ფაზური განვითარების თვალსაზრისით შემდგარი პროდუქტი იქნება, ანუ დასრულებული, როგორც უსაფრთხოებისა და ეკონომიკური, ასევე კონცეფციური თვალსაზრისით”, – ამბობს გოჩა კამკია და იქვე დასძენს, რომ “ამბასადორი ჯგუფმა” პროექტირებისთვის დარგის სპეციალისტები – ფინანსისტები, არქიტექტორები თუ ურბანისტები მსოფლიოს სხვადასხვა წერტილიდან – ლონდონიდან, სტამბოლიდან, ანკარიდან და ნიუ-იორკიდან მოიწვია.
“არ დაგვიკარგავს დრო და უკვე დავასრულეთ 5 ულტრათანამედროვე შენობაზე მუშაობა. აქედან, 3 მრავალფუნქციური კომპლექსი იქნება, სადაც განთავსდება ბრენდული სასტუმრო, აპარტამენტები, ლაუნჯი, ინფინიტი აუზი და ყველა ის ინფრასტრუქტურა, რაც თანამედროვე მსოფლიოში ადამიანის კომფორტული განთავსებისთვის აუცილებელია.
ამასთან, ვავითარებთ 2 შენობა-ნაგებობას, რომელიც დაბალი განაშენიანებით იქნება გამორჩეული. ერთ შენობაში კუნძულის ადმინისტრაცია განთავსდება, სადაც მომხმარებელი მომსახურებას მიიღებს”, – აღნიშნავს პროექტის განვითარების დეტალებზე საუბრისას გოჩა კამკია.
“ამბასადორი აილენდ ბათუმის” პროექტში უძრავი ქონების შეძენის მსურველებზე კომპანია სიმბოლური პასპორტების გაცემის იდეასაც ამუშავებს. პროექტით დაინტერესებული პირებისა და ინვესტორებისთვის “ამბასადორი აილენდ ბათუმის” მმართველმა კომპანიამ ბათუმში მომსახურების ცენტრი უკვე გახსნა, რომელიც პროექტის პირველი ფაზის დასრულების შემდეგ ნახევარკუნძულზე გადავა.
“ჩვენი სერვისცენტრის მეშვეობით გადავწყვიტეთ პირდაპირი კომუნიკაცია ვაწარმოოთ თითოეულ მომხმარებელთან. ეს იქნება როგორც უძრავი ქონების შეთავაზება, რომელზეც ძალიან დიდია ინტერესია. ეს იქნება, აპარტამენტები თუ მიწის ნაკვეთები. ასევე, ის მომავლის სერვისები, რომლითაც კუნძული გამორჩეულია. სივრცეში ამ დროისათვის 15 ადამიანია დასაქმებული”, – აცხადებს “ამბასადორი აილენდ ბათუმის” გენერალურ დირექტორი.
მისივე ცნობით, პროექტი ქვეყნის ახალ სახეს შექმნის, რომელიც ბათუმის ისტორიულ ნაწილზე უხეშ ჩარევას არ მოახდენს.
