თბილისში, აგლაძის ქუჩაზე 86 093 მ² ტერიტორიაზე მულტიფუნქციური კომპლექსის პროექტის განხორციელებას იგეგმება. კომპანია „საქინვესტი” ამ ეტაპისთვის განაშენიანების რეგულირების გეგმის გეგმარებით დავალებას თბილისის მერიასთან ათანხმებს.

კომპანია „საქინვესტი“ 2006 წელსაა რეგისტრირებული და მისი მფლობელი კომპანიები არიან ნიდერლანდებში რეგისტრირებული GARDABANI HOLDINGS PP B.V, (50%) და კვიპროსზე რეგისტრირებული კომპანია „ბარგუზინო ენერჯი თრეიდინგ ლიმიტედი“.

პროექტის საინვესტიციო ღირებულება და შესრულების ვადები ამ ეტაპისთვის უცნობია.

მუნიციპალური სერვისების განვითარების სააგენტოს ვებგვერდზე ატვირთული დოკუმენტებიდან ირკვევა, რომ კომპანია პროექტის განვითარებას აგლაძის 32 ნომერში ოთხ საკადასტრო კოდზე აპირებს, რომელზედაც დღემდე სასაწყობე და დამხმარე ნაგებობებია მაქსიმალური 2-3-სართულიანი სიმაღლით. ამასთან, მიწათსარგებლობის გენგეგმის მიხედვით – მთლიან ტერიტორიაზე გაბარიტული ტრანსპორტის შეზღუდვის არეალი ვრცელდება. საპროექტო ტერიტორიაზე დედაქალაქის მიწათსარგებლობის გენერალური გეგმის მიხედვით სამრეწველო ზონა 1 (ს-1) სტატუსი ვრცელდება.

განაშენიანების რეგულირების გეგმის გეგმარებით დავალების განმარტებითი ბარათიდან ირკვევა, რომ ტერიტორიაზე საცხოვრებელი ზონა 6-ის ფუნქციით განვითარება იგეგმება, სადაც სავარაუდოდ 20 შენობა განლაგდება. ამასთან, ტერიტორიაზე პროექტით გათვალისწინებულია რეკრეაციული სივრცის – ცენტრალური ბულვარის, საფეხმავლო ბილიკების, კომერციული სივრცეების, მინი მოედნების მოწყობა.

„საპროექტოდ დაგეგმილია ტერიტორიის სრულად განვითარება საცხოვრებელი ზონა 6-ის ფუნქციით, ზონის შესაბამისი კოეფიციენტებით : კ1 – 0.5; კ2 – 2.5; კ3 – 0.3.

ტერიტორიაზე იგეგმება, სავარაუდოდ, 20 შენობის განთავსება. მათგან ნაწილი პერიმეტრული განაშენიანების, ხოლო ნაწილი – მაღლივი შენობები იქნება. მაქსიმალური სართულიანობა სავარაუდოდ 21 მიწისზედა სართული იქნება. ზემოაღნიშნული პერიმეტრული შენობები იქნება 6 მიწისზედა სართული. საპროექტოდ ტერიტორიაზე მოეწყობა ცენტრალური სკვერი, რომელიც სავარაუდოდ იქნება 7000 მ² ფართობის. ტერიტორიაზე ასევე დაგეგმილია საფეხმავლო ბულვარის მოწყობა, რომელიც ჩრდილოეთიდან სამხრეთით გადაკვეთს მთელ არეალს. საპროექტოდ ყველა ავტოსადგომი მოეწყობა მიწისქვეშ“, – აღნიშნულია დოკუმენტის განმარტებით ბარათში.

დოკუმენტში აღწერილია ასევე რას მოიცავს მულტიფუნქციური კომპლექსი, რომლის კონცეფციის მთავარი პრინციპი ერთიანი მყუდრო კომპლექსის შექმნაა, რომელიც ცენტრალური ბულვარის ღერძის გასწვრივ განვითარდება.

„კონცეფციის მთავარი პრინციპი და პრიორიტეტი არის საფეხმავლო სივრცეების შექმნა, როგორსაც წარმოადგენს გამწვანებული ცენტრალური ბულვარი. აღნიშნული ბულვარი გრძივად კვეთს საპროექტო არეალს. ბულვარის მხარეს იგეგმება კომერციული სივრცეების მოწყობა, რომლებიც ჩვენი რწმენით უნდა გახდეს ახალი მიზიდულობის ცენტრი ქალაქში სხვადასხვა თაობის მოქალაქეებისთვის. მსგავსი მაგალითები ძველ ინდუსტრიულ შენობებსა, თუ ტერიტორიებზე უკვე გვაქვს თბილისის მასშტაბით.

შემოთავაზებული საგზაო ინფრასტრუქტურა არ განეკუთვნება საზოგადოებრივ გზებს და ემსახურება მხოლოდ მცხოვრების მიწისქვეშა პარკინგზე ჩასვლას ან კომერციული სივრცეების დისტრიბუციით მომსახურებას. შიდა გზების ფორმა და ტრაექტორია არა მხოლოდ ერწყმის კომპლექსის არქიტექტურას, ისე რომ ქმნის ფართო მინი მოედნებს ბულვართან კვეთის წერტილებში საინტერესო სივრცეების მოსაწყობად, არამედ ევროპული ქვეყნების მაგალითიდან გამომდინარე ატარებს ფუნქციონალურ დატვირთვას. გზების ტრაექტორია ბუნებრივად განაპირობებს კომპლექსში შემოსული მანქანების დაბალ სიჩქარეზე მოძრაობას იმისათვის რომ ბევრი ხელოვნური ჩარევის გარეშე პრიორიტეტი მიენიჭოს ბულვარში გადაადგილებულ ფეხით მოსიარულე ადამიანს. აღნიშნული გზების პროფილებიც სრულად არის მორგებული ფეხით მოსიარულე ადამიანებზე.

დამატებით გზები დაპროექტებულია იმ პრინციპით რომ არ მოხდეს შემდგომში საპროექტო არეალის გარშემო არსებული სხვადასხვა სახის საცალო თუ საბითუმო ვაჭრობის ობიექტებიდან სატვირთო ან სხვა სახის ტრანსპორტის გაჩერება დაპარკინგება.

საპროექტო არეალის გარშემო ტერიტორია ძირითადად ატარებს სსზ-2 [განაშენიანების მაღალი ინტენსივობის ზონა] ან სსზ-1-ის [საშუალო ინტენსივობის საზოგადოებრივ-საქმიანი ზონა] ფუნქციურ ზონებს. აღნიშნულის მიხედვით გვაქვს შემოთავაზებული ასევე საპროექტო არეალის მსგავსი ზონირებით განვითარება, რადგან არ იქნება ამოვარდნილი მეზობელი ტერიტორიიდან. მიუხედავად ამისა, გავითვალისწინეთ თქვენი პოზიცია რომ საპროექტო არეალი განვავითაროთ სზ-6-ით [მაღალი ინტენსივობის საცხოვრებელი ზონა, სადაც განაშენიანების დომინირებული სახეობაა საცხოვრებელი სახლები. ასევე, დასაშვებია ამ წესების დანართი 1-ით განსაზღვრული ძირითადი და სპეციალური ზონალური ნებართვით დაშვებული სახეობები] და დავკარგოთ დაახლოებით 80 000 კვ. მეტრამდე კ2 კოეფიციენტის საანგარიშო ფართობი, რაც ძალიან დიდ რისკს უქმნის პროექტის ფინანსურ ეკონომიკურ მიზანშეწონილობას ისედაც საკმაოდ რთულ და სარისკო არეალში. გზების სატრანსპორტო ზონად გამოყოფა დამატებით დარტყმას აყენებს პროექტის მაჩვენებლებს, გარდა იმისა, რომ არღვევს კონცეფციის ძირითად პრინციპებს.

კონცეფციის გარკვეულწილად შენარჩუნების პრინციპით მზად ვართ ნაკვეთის უკიდურესი სამხრეთი (ბაქრაძის ქუჩის გაგრძელება) გამოვყოთ საჯარო სერვიტუტით მომავალში ბაქრაძის ქუჩის გაგრძელების პერსპექტივით მარცხენა სანაპიროს მიმართულებით. აღნიშნული გადაწყვეტილება არ დაარღვევს საფეხმავლო ბულვარისა და კომპლექსის ერთიანობასა და სიმყუდროვეს. აღნიშნული დაზუსტდება განაშენიანების რეგულირების გეგმის პროექტის ეტაპზე“, – წერია განმარტებით ბარათში.