მოსახლეობის მიერ მომსახურების ხარისხის შეფასება გაუმჯობესდა – რომელი სფეროები ლიდერობენ?

„ეისითი კვლევის“ (ACTR) კვლევის – „საქართველოში სერვისების ხარისხი და მომხმარებლის გამოცდილება“ – მიხედვით, საქართველოს მოსახლეობის მიერ მომსახურების ხარისხის შეფასების მაჩვენებელი გაიზარდა.

კონკრეტულად კი კვლევის შედეგებით ირკვევა, რომ მომხმარებელმა მომსახურების ხარისხი საშუალოზე მაღალი ქულით შეაფასა: 10-ბალიანი სკალით 7.04 ქულა, რაც 2023 წელთან შედარებით 0.4 ქულით (2023: 6.64 ქულა) გაზრდილია.

ACTR-მა სატელეფონო გამოკითხვა საქართველოს მასშტაბით შემთხვევითი შერჩევის გზით, 804 ზრდასრულ მოსახლეს შორის ჩაატარა. გამოკითხვა მიმდინარეობდა 2025 წლის 22-26 აპრილს. მონაცემთა სტატისტიკური ცდომილება, საშუალოდ, არ აღემატება 3.5%-ს.

„მომსახურების სფეროში მზარდი კონკურენცია ახალი სტანდარტების ჩამოყალიბებასა და მომხმარებელზე კიდევ უფრო ორიენტირებული მიდგომების დანერგვას მოითხოვს. ამ ფონზე განსაკუთრებით საინტერესო ხდება იმის შესწავლა, სად ხედავს მომხმარებელი კომფორტს და პროფესიონალიზმს და სად რჩება მოლოდინები დაუკმაყოფილებელი“ – აღნიშნავენ კომპანიაში.

კვლევის მიხედვით, სააფთიაქო მომსახურება 2025 წელსაც ინარჩუნებს ლიდერ პოზიციას (8.75 ქულა) და ეს მაჩვენებელი 2023 წელთან შედარებით გაუმჯობესებულია (8.59 ქულა). „როგორც ჩანს, აფთიაქები მომხმარებელს კვლავ მათზე მორგებულ მომსახურებას აწვდიან, რაც მათ მაღალ კმაყოფილებას იწვევს“, – აღნიშნავენ კვლევის ავტორები.

მეორე და მესამე ადგილებს იკავებენ:

• გასართობ-შემეცნებითი მომსახურებები — 8.26 ქულა
• სილამაზისა და თავის მოვლის მომსახურებები — 8.24 ქულა

ACTR-ის შეფასებით, ეს სფეროები მომხმარებლისთვის ემოციური და სოციალური კეთილდღეობის განმსაზღვრელი სერვისებია და მათი მაღალი შეფასება მიუთითებს სერვისის ხარისხზე და მომხმარებელზე ორიენტირებულ მიდგომებზე.

გამოკითხვის შედეგებში აღნიშნულია, რომ 2023 წელს, TOP-სამეულში შედიოდა მიტანის სერვისებიც (8.2 ქულა), რომლის კმაყოფილების მაჩვენებელიც 2025 წელს შემცირდა, რაც შესაძლოა სერვისის ხარვეზებთან ან მომსახურების ხარისხის შემცირებასთან იყოს დაკავშირებული.

„ამას გარდა, კმაყოფილების მაჩვენებლები თითქმის ყველა მომსახურების სფეროში გაიზარდა გარდა: მიწოდება/მიტანის სერვისებისა და სუპერმარკეტის, ჰიპერმარკეტის, მინიმარკეტის, მაღაზიებისა და მოლებისა. რაც ნიშნავს, რომ აღნიშნულმა სფერომ ვერ მოახერხა მომხმარებელთან ემოციური კავშირის დამყარება და გამოცდილების გაუმჯობესება“, – ნათქვამია ACTR-ის კვლევაში.