16 მაისს, თბილისში, ახალი სპორტის სასახლის მიმდებარე ტერიტორიაზე ახალგაზრდა კაცს სცემეს. ბექა ონიანი თავის ტრავმით კავკასიის მედიცინის ცენტრშია გადაყვანილი, მისი მდგომარეობა სტაბილურად მძიმეა, იმყოფება ხელოვნურ კომაში. დაზარალებულის დეიდამ ტაბულასთან საუბარში განაცხადა, რომ ფუტსალის მატჩის დროს, ფეხბურთელებს შორის შელაპარაკება მოხდა. ოჯახის წევრების განცხადებით, ბექა ონიანი ინციდენტში არ მონაწილეობდა, მაგრამ მას თავს დაესხნენ. ბექა ონიანის დეიდა, სავარაუდო თავდამსხმელის ვინაობასაც ასაჯაროებს. მისი თქმით, ონიანს ივა ტყეშელაშვილი დაესხა თავს. ოჯახი მომხდარის დროულ გამოძიებას ითხოვს. მათი განცხადებით, ივა ტყეშელაშვილის მამა პოლიციელი იყო და შესაძლოა, გამოძიების გაჭიანურება ამასაც უკავშირდებოდეს. 18 მაისს, შინაგან საქმეთა სამინისტროს ცნობით, ბექა ონიანზე თავდამსხმელი დააკავეს. უწყების განმარტებით, ონიანმა მძიმე ტრავმა დარტყმის შემდეგ დაცემისგან მიიღო. მას ბრალდება საქართველოს სისხლის სამართლის კოდექსის 117-ე მუხლის პირველი ნაწილით (ჯანმრთელობის განზრახ მძიმე დაზიანება) წარედგინა, რაც სასჯელის სახედ და ზომად 7 წლამდე თავისუფლების აღკვეთას ითვალისწინებს. “გამოძიებით დადგინდა, რომ მიმდინარე წლის 16 მაისს, ბრალდებულმა თბილისში, უნივერსიტეტის ქუჩაზე მდებარე ახალი სპორტის სასახლის მიმდებარე ტერიტორიაზე ფიზიკურად იძალადა 1998 წელს დაბადებულ ბ.ო.-ზე, რის შედეგად ბ.ო. წაიქცა და თავის არეში დაზიანება მიიღო. მომხდარის შედეგად ი.ტ. შემთხვევის ადგილიდან მიიმალა, ხოლო დაშავებული მამაკაცი კლინიკაში გადაიყვანეს, სადაც შესაბამისი მკურნალობა უტარდება. სამართალდამცველებმა ჩატარებული საგამოძიებო მოქმედებების შედეგად ბრალდებული მომხდარიდან რამდენიმე საათში დააკავეს. გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით მიმდინარეობს, რაც ჯანმრთელობის განზრახ მძიმე დაზიანებას გულისხმობს,” — აღნიშნულია შსს-ის მიერ გავრცელებულ ინფორმაციაში. ბექა ონიანი კომპანია “ტენეს” თანამშრომელია. კომპანიის განცხადებაში ვკითხულობთ, რომ მძიმე დაზიანებების გამო ონიანი მეორე დღეა ხელოვნურ კომაში იმყოფება და მათი მოთხოვნაა დამნაშავე სათანადოდ დაისაჯოს. “გუშინ წარმოუდგენელი ბოროტება მოხდა: ჩვენს თანამშრომელს ბექა ონიანს, ფეხბურთის თამაშის დასრულების შემდეგ გასახდელიდან გამოსვლისას თავს დაესხნენ, თავში ჯერ ხელით, ხოლო ძირს დავარდნის შემდეგ ორი ფეხით მიაყენეს დაზიანება.ინციდენტის შედეგად მას თავში განუვითარდა სისხლჩაქცევა, რის გამოც ექიმებს მოუწიათ მისი ხელოვნურ კომაში გადაყვანა და თავის ქალის ნაწილობრივი ტრეპანაცია.ბექას მდგომარეობა სტაბილურად მძიმეა და იგი მეორე დღეა სიცოცხლისთვის იბრძვის!მიზეზი თამაშის დროს მომხდარი შელაპარაკებაა, რომელშიც ბექას არც კი მიუღია მონაწილეობა! ზოგადად ბექა სრულიად უკონფლიქტო და თავაზიანი ადამიანია, გამოირჩევა კომუნიკაბელურობით და დიპლომატიით. მისი მხრიდან რაიმე სახის კონფლიქტის გამოწვევა არავის ახსოვს. ონო არის ფეხბურთელი, მწვრთნელი, მუსიკოსი და ჩვენი მარკეტინგისა და საზოგადოებასთან ურთიერთობის მენეჯერი. იგი წერს მუსიკას და სკოლებში ატარებს ლექციებს გარემოსდაცვით საკითხებზე. რა გამართლებაც არ უნდა მოუძებნოს დამნაშავემ, არანორმალურია მის მიმართ ასეთი სისასტიკის გამოჩენა. მის ოჯახთან სისტემატურ კავშირზე ვართ და მათთვის ამ ეტაპზე უპირველესი მნიშვნელობის საკითხია ბექას მდგომარეობიდან გამოყვანა… სხვა არაფერს ამბობენ ამჟამად ისინი.ჩვენი მხრიდან, კი გეტყვით, რომ ამ ეტაპზე საჭიროა საზოგადოების კონსოლიდაცია, რომ დამნაშავე, რომელიც საბედნიეროდ უკვე დაკავებულია კანონის სრული სიმკაცრით დაისაჯოს. არ მოხდეს რაიმე სახით მისი დანაშაულის შემსუბუქება, მიუხედავად მისი ოჯახის შესაძლო გავლენებისა. ერთხელ და სამუდამოდ უნდა დასრულდეს ჩვენს ქვეყანაში მსგავსი ბოროტება და არაფრისმთქმელი ძალადობა.ყველამ უნდა იცოდეს, რომ ასეთი საქციელი და მითუმეტეს წაქცეული კაცისთვის წიხლის ჩარტყმა, არა ვაჟკაცობად, არამედ დეგრადაციად და არასრულფასოვნებად შეფასდება საზოგადოების მხრიდან,” — ვკითხულობთ განცხადებაში.