„ჩვენ გვაქვს გამორჩეული შინაარსის საგზაო შემთხვევები, რომელიც თითქოს დაკავშირებულია გარკვეულ ტრადიციასთან. ერთ-ერთი ასეთი ტრადიციაა, რომ ბოლო ზარზე მშობლები ჩუქნიან თუ თხოვნიან ავტომობილებს შვილებს, რაც სრულდება უამრავი ტრაგედიით”, – ამის შესახებ საქართველოს ტრანსპორტისა და გზების ასოციაციის თავმჯდომარემ დავით მესხიშვილმა „საქმიანი დილის“ ეთერში ისაუბრა და მოქალაქეებს მეტი სიფრთხილის გამოჩენისკენ კიდევ ერთხელ მოუწოდა.

მესხიშვილმა საგზაო უსაფრთხოების მხრივ სასწავლო პროგრამების დანერგვაზეც გაამახვილა ყურადღება და მუნიციპალიტეტებს თანამშრომლობისკენ მოუწოდა.

„ბოლო ზარი ხშირად არის ხოლმე უბედურების ზარი, იმიტომ რომ ხდება საგზაო შემთხვევები, სადაც იღუპებიან არასრულწლოვნები და მინდა მივმართო მშობლებს, რომლებიც შვილებს აძლევენ ავტომობილებს, – რატომ აკეთებთ ამას?! რატომ ღუპავთ საკუთარ და სხვების შვილებს? რა ნიშნავს ის, რომ როცა ემოციურად აჟიტირებულ ბავშვებს, რომელთა ფსიქოემოციური მდგომარეობა არ შეესაბამება საჭის მართვას, აძლევთ ავტომობილს? ხომ უნდა დავასრულოთ ეს?

ამბობენ იყოს დაჯარიმება, კი იყოს, მაგრამ ყველა გარღვევაზე თითო ეკიპაჟი ვერ იქნება მიმაგრებული. იგივე შეიძლება ქორწილზეც.. ერთხელ და სამუდამოდ ქორწილის თემა ტრაგედიასთან რომ არ იყოს დაკავშირებული, ხომ შეიძლება? ამ ტრაგედიებს ადამიანები თავად ქმნიან, კანონს უნდა აღვასრულებდეთ და თუ არ სრულდება ამაზე პასუხისმგებლობა შესაბამისს უწყებებს აქვთ, მაგრამ ჩვენც გვაქვს.

ჩვენ გვაქვს ბაღში შესატანი პროგრამა, რომელიც შემუშავებულია ფსიქოლოგებთან ერთად. ბაღის ასაკიდან უნდა ისწავლებოდეს საგზაო უსაფრთხოება. მე მინდა მივმართო მუნიციპალიტეტებს, რომ ამის დანერგვაში მიიღონ მონაწილეობა. ცოდნას და განათლებას აქვს დიდი მნიშვნელობა.“ – განაცხადა მესხიშვილმა.