როდესაც რუსეთი 6 ივნისის ღამეს უკრაინის სამოქალაქო ინფრასტრუქტურას ბომბავდა, იმავე დროს მისი სტრატეგიული სამხედრო ობიექტები ცეცხლის ალში იყო. დრონებით დარტყმა მიაყენეს სტრატეგიულად მნიშვნელოვან აეროდრომს ენგელსში, სადაც განთავსებულია ბომბდამშენები, რომლებიც უკრაინაზე შეტევებისთვის გამოიყენება — ამის შესახებ Kyiv Post იტყობინება. უკრაინის დეზინფორმაციის წინააღმდეგ ბრძოლის ცენტრის ხელმძღვანელის, ანდრი კოვალენკოს ინფორმაციით, დრონებმა დარტყმები მიაყენეს ნავთობბაზას ენგელსში, ასევე დიაგილევოს სამხედრო აეროდრომს და თავდაცვით ქარხანა “პროგრესს’ მიჩურინსკში, ტამბოვის ოლქში. კოვალენკოს განცხადებით, ქარხანა “პროგრესი” ერთ-ერთ მთავარ საწარმოს წარმოადგენს რუსეთის სამხედრო-სამრეწველო კომპლექსში და მისი განადგურება ქვეყნის თავდაცვით წარმოებას სერიოზულ დარტყმას აყენებს. “სწორედ აქ აწარმოებს რუსეთი იმ კომპონენტებს, რომლებიც მის სარაკეტო და საარტილერიო სისტემებს ამუშავებს”, — აღნიშნა კოვალენკომ. ქარხანა “პროგრესი” სპეციალიზებულია მაღალი სიზუსტის ელექტრონული ტექნიკის წარმოებაში — მათ შორის, დამიზნების, სტაბილიზაციისა და ცეცხლის კონტროლის სისტემებში, რომლებიც გამოიყენება არტილერიისა და რეაქტიული ზალპური ცეცხლის სისტემებისთვის. ის ასევე ამუშავებს კომპონენტებს ავტომატიზებული მართვისა და საკომანდო სისტემებისთვის, რაც კრიტიკულად მნიშვნელოვანია თანამედროვე საბრძოლო მოქმედებებისთვის.
Kyiv Post: უკრაინამ რუსეთის ორ სტრატეგიულ ნავთობის საცავს დრონებით შეუტია
