საქართველოში განხორციელებული პირდაპირი უცხოური ინვესტიციების მოცულობამ 2025 წლის I კვარტალში 7.7%-ით 179.4 მლნ დოლარამდე შემცირდა. აქედან 150 მლნ დოლარი რეინვესტიციაა, რაც მთლიან FDI-ში 83.6%-ს იკავებს.
საქსტატის მიერ გამოქვეყნებული წინასწარი მონაცემებით, FDI-ის კლება სააქციო კაპიტალის და სავალო ვალდებულებების მაჩვენებლის შემცირებით იყო განპირობებული. 2025 წლის I კვარტალში სააქციო კაპიტალმა 62.1 მლნ დოლარი შეადგინა, რაც მთლიანი პირდაპირი უცხოური ინვესტიციების 34.6%-ია.
BM.GE-მ საქსტატიდან TOP-10 კომპანია გამოითხოვა, რომლებშიც იანვარ-აპრილში FDI-ის სახით ყველაზე მეტი თანხა ჩაიდო. მოწოდებული ინფორმაციით, უმსხვილესი ინვესტორი კომპანიებიდან 3 ენერგეტიკის სექტორში ოპერირებს, 2 – დამმუშავებელ მრეწველობაში, 1 – ინფორმაციასა და კომუნიკაციაში, 1 – უძრავ ქონებაში, ერთი ტურიზმში [სტუმარმასპინძლობაში], ერთი კი ტრანსპორტისა და დასაწყობების სექტორში. ჩამონათვალში ვხვდებით ახალ კომპანიებსაც, მაგალითისთვის “ატლას ჰოლდინგსი”, “რივერსაიდ ინვესტი”, “ხედი”.
|
აიდიეს ბორჯომი საქართველო, შპს აიდიეს ბორჯომი ბევერიჯიზ კომპანის საქართველოს ფილიალი |
დამამუშავებელი მრეწველობა |
ნიდერლანდები |
|
შპს მაგთიკომი |
ინფორმაცია და კომუნიკაცია |
აშშ |
|
შპს თბილისი ენერჯი |
ენერგეტიკა |
მარშალის კუნძულები |
|
სს ენერგო – პრო ჯორჯია |
ენერგეტიკა |
ჩეხეთი |
|
სს მინა |
დამმუშავებელი მრეწველობა |
თურქეთი // გაერთიანებული სამეფო |
|
შპს ატლას ჰოლდინგსი |
ხელოვნება, გართობა და დასვენება |
გაერთიანებული სამეფო |
|
შპს რივერსაიდ ინვესტი |
უძრავ ქონებასთან დაკავშირებული საქმიანობები |
ვირჯინის კუნძულები, ბრიტანეთი // ბულგარეთი / აშშ |
|
სს ეპ ჯორჯია მიწოდება |
ენერგეტიკა |
ჩეხეთი |
|
შპს ხედი |
განთავსების საშუალებებით უზრუნველყოფის და საკვების მიწოდების საქმიანობები |
რუსეთი |
|
შპს სოკარ მიდსთრიმ ოპერეიშენს – საქართველოს ფილიალი |
ტრანსპორტი და დასაწყობება |
აზერბაიჯანი |
წლის პირველ მეოთხედში ქვეყანაში შემოსული პირდაპირი უცხოური ინვესტიციებში სამი უმსხვილესი სექტორის წილმა 83.6% შეადგინა.
2025 წლის I კვარტალში ყველაზე მეტი პირდაპირი უცხოური ინვესტიცია ენერგეტიკის სექტორში განხორციელდა და 70.2 მლნ დოლარი შეადგინა, რაც მთლიანი პირდაპირი უცხოური ინვესტიციების 39.1%-ია. მეორე ადგილს იკავებს ინფორმაციისა და კომუნიკაციიის სექტორი – 52.3 მლნ. აშშ დოლარით (29.2%), ხოლო მესამეზე იმყოფება დამმუშავებელი მრეწველობის სექტორი 27.5 მლნ. აშშ დოლარით (15.3%).
2025 წლის I კვარტალში საქართველოში განხორციელებული პირდაპირი უცხოური ინვესტიციების მიხედვით, სამი უმსხვილესი ინვესტორი ქვეყნის წილი ინვესტიციების მთლიანი მოცულობის 61.7%-ს შეადგენს.
2025 წლის I კვარტალში პირველ ადგილზეა ჩეხეთი – 43.0 მლნ. აშშ დოლარით, რაც მთლიანი პირდაპირი უცხოური ინვესტიციების 23.9%-ს შეადგენს, მეორე ადგილზე აშშ-ია 39.6 მლნ. აშშ დოლარით (22.1%), ხოლო მესამეზე თურქეთი – 28.1 მლნ. აშშ დოლარით (15.7%).
