თბილისიდან 20 წუთის სავალზე, სოფელ ახალუბანში სასტუმრო კომპლექსი Villa Mosavali ბიზნესს ავითარებს და წელს ორი ახალი პროექტის დასრულებას გეგმავს. კომპანია 20 მლნ ლარის ინვესტირებით 200-250 შეზლონგზე გათვლილი, თანამედროვე სტანდარტების აუზის გახსნას მაისში, 1000 კაცზე გათვლილი საღონისძიებო სივრცის ამოქმედებას კი შემოდგომისთვის გეგმავს. Villa Mosavali-ს სიახლეებზე კომპანიის გენერალურმა მენეჯერმა ნიკოლოზ შეყრილაძემ გადაცემა #რედაქტ2-ში ისაუბრა.
“ბიზნესის გაფართოების მიმართულებით უკვე ვახორციელებთ და თითქმის დასრულებული გვაქვს ერთ-ერთი უმნიშვნელოვანესი პროექტი, რომელსაც განსაკუთრებული მნიშვნელობა ექნება ჩვენი კომპლექსის მრავალფეროვნებისთვის.
კერძოდ, მაისში ვგეგმავთ სრულიად ახალი, თანამედროვე სტანდარტების შესაბამისი აუზის გახსნას. ეს არ იქნება უბრალოდ საცურაო სივრცე, ეს იქნება სრულფასოვანი დასვენებისა და განტვირთვის ზონა, რომელიც მოიცავს დაახლოებით 200-დან 250-მდე შეზლონგს, რაც ნიშნავს, რომ ერთდროულად ბევრ სტუმარს შეეძლება კომფორტულად დაისვენოს. აუზის სივრცე განსაკუთრებული კომფორტით გამოირჩევა — მას ექნება 5 გამოყოფილი VIP ზონა”, – აღნიშნა ნიკოლოზ შეყრილაძემ.
რაც შეეხება საღონისძიებო სივრცის მოწყობას, მისი დასრულება ოქტომბრისთვის აქვთ დაგეგმილი. კომპანიის გენერალური მენეჯერი აღნიშნავს, რომ ეს სივრცე ხელს არამხოლოდ მათი ბიზნესის განვითარებას, არამედ რეგიონის გამოცოცხლებას.
“პარალელურად მიმდინარეობს კიდევ ერთი ძალიან მასშტაბური პროექტი, ახალი საღონისძიებო დარბაზის მშენებლობა, რომლის გახსნაც 2025 წლის ოქტომბერშია დაგეგმილია. დარბაზი გათვლილია 1000-მდე სტუმარზე, რაც ქმნის უნიკალურ შესაძლებლობას არა მხოლოდ ქორწილებისთვის, წვეულებებისთვის და კონცერტებისთვის, არამედ დიდი კორპორაციული და საერთაშორისო ღონისძიებებისთვისაც. გარდა ძირითადი დარბაზისა, იმავე შენობაში მოეწყობა საკონფერენციო სივრცე, გათვლილი 300 ადამიანზე, რაც ვილა მოსავალს აქცევს ერთ-ერთ ყველაზე ფუნქციურ ლოკაციად საქართველოში. ვფიქრობთ, ამ სივრცეზე, როგორც მრავალფუნქციურ სივრცეზე, რომელიც ხელს შეუწყობს ადგილობრივი ეკონომიკის განვითარებასაც და უცხოური ვიზიტორების მოზიდვასაც”, – განაცხადა ნიკოლოზ შეყრილაძემ.
Villa Mosavali, რომელიც დღეისთვის სასტუმროს, 2 რესტორანს, აუზს, სადეგუსტაციო სივრცეს და მეღვინეობას აერთიანებს, 60 სამუშაო ადგილს ქმნის. სეზონზე დატვირთულობის ზრდასთან ერთად კი დასაქმებულთა რაოდენობა 100-მდე იზრდება.
